वदनी कवळ घेता नाम घ्या श्रीहरीचे | सहज हवन होते नाम घेता फुकाचे ||
जीवन करी जिवित्वा अन्न हे पूर्ण ब्रह्म | उदरभरण नोहे जाणिजे यज्ञकर्म ||

Wednesday, February 27, 2008

चॉकलेट मॅकरून (Chocolate Macaroon)

बाजारात मिळणा-या चॉकलेट मॅकरूनमध्ये अंडे, तूप, साखर आणि चॉकलेट पावडर असते. अंडे मी खात नसल्याने मला हा प्रकार कधी खाता येत नसे. एकदा घरच्या घरी थोडा प्रयत्न करुन बघु म्हणुन मी हे करुन पाहीले आणि सतत करत राहीले.

१ कप ओल्या खोब-याचा चव
१ कप पिठीसाखर
१ कप चॉकलेट पावडर (unsweetened)

कृती -
फूडप्रोसेसर मधे कणीक मळण्यासाठी जे पाते असते ते लावुन साखर आणि ओले खोबरे एकत्र करावे. त्यात चॉकलेट पावडर घालुन नीट मिश्रण बनवून घ्यावे. ह्या झालेल्या मिश्रणाचे साधारण १ इंच व्यासाचे लाडू बांधावेत आणि एका ताटलीमधे ठेवून फ्रिजमध्ये ठेवावेत. साधारण ३-४ तास सेट होऊ द्यावेत.

टीप -
१. माझ्याकडे raw chocolate म्हणाजे चॉकलेट्च्या न भाजलेल्या बिया होत्या त्याची पावडर करुन मी वापरली होती अप्रतीम लागत होते.
२. पिठीसाखर आवडीप्रमाणे कमीजस्त करु शकता.
३. चॉकलेट पावडर unsweetened च वापरा त्याने चव चांगली लागते.
४. लाडू वळत बसण्याऐवजी आईस्क्रीम स्कूप ने लहान लहान स्कूप पाडा. घरी असलेल्या लहान पळीला पाणी लावुनही हा प्रकार करता येईल.

Friday, February 08, 2008

व्हेजीटेबल कटलेट्स (Vegetable Cutlets)

ही रेसीपीदेखील माझी मैत्रीण अश्विनीचीच. मधे पार्टीसाठी खुप लहानमुले येणार होती आणि नेहेमी मुलांसाठी मोठ्यांचेच जेवण असते आणि बरेचदा खाणे तसेच टाकुन दिले जाते म्हणुन मुद्दाम मुलांसाठी म्हणुन हा पदार्थ केला होता आणि मुलांनी अगदी आवडीने खाल्ला.

१ मोठे बीट
१ मोठा बटाटा
१/२ कप फ्लॉवरचे तुकडे
१/२ कप कोबी
१/२ वाटी मटार
१-२ हिरव्या मिरच्या
चवीप्रमाणे मीठ
१/२ टीस्पून जि-याची पावडर
१/२ वाटी कोथिंबीर
१ कप ब्रेड्क्रम्स

कृती - बीट आणि बटाटे कुकरमधे वाफवून घ्यावेत. थंड झाल्यावर साली काढुन मोठ्या खिसणीने खिसुन घ्यावे. त्याबरोबर फ्लॉवर, कोबी पण खिसुन अगर मिक्सरमधुन काढुन बारीक करुन घ्यावा. मटारचे दाणे थोडे ठेचुन घ्यावेत. मिरच्या मिक्सरमधुन बारीक करुन घ्याव्यात. मीठ, वाटलेल्या मिरच्या, जिरापूड, कोथिंबीर, सगळ्या भाज्या, आणि अर्धा कप ब्रेडक्रम्स एका मोठ्या बाऊलमधे हलक्या हाताने एकत्र करावे. लागले तर एका थोडे ब्रेडक्रम्स घालावेत. हे मिश्रण साधारण बटाटेवड्याच्या सारणासारखे मऊसर असावे. आता ह्या मिश्रणाचे साधरण १ इंचाचे बॉल करुन घ्यावेत. आता ओव्हन ३५० फॅरेनहाईट टेंपरेचरवर प्रीहीट करण्यासाठी चालु करावा. एका बेकिंग डीशला तेलाचा हात लावुन ठेवावा. उरलेले ब्रेडक्रम्स एका पसरट बाऊलमधे घ्यावेत. आता मिश्रणाचे बॉल थोडे चपटे करुन ब्रेडक्रम्समध्ये घोळवून बेकिंगडीशमध्ये ठेवावेत. सगळे कटलेट्स करुन झाल्यावर असेल तर ऑईलस्प्रे हलक्या हाताने मारावा. ओव्हनचे टेंपरेचर ३२५ करावे आणि ट्रे १५ मिनीटे बेक करावा. एक बाजु झाली की सगळे कटलेट्स उलटुन पुन्हा १५ मिनीटासाठी बेक करायला ठेवावेत.
पुदीना चटणी, केचप बरोबर खाण्यास द्यावेत. दिलेल्या प्रमाणात साधारण १५ कटलेट्स होतात.

टीप -
१. ह्यामध्ये गाजर, फरसबी, अशा कोणत्याही भाज्या कमीजास्त प्रमाणात घालता येतात. शक्यतो बीट व बटाट्यांचे प्रमाण कमी करु नये.
२. ब्रेडक्रम्स मिळणॅ शक्य नसेल तर शिळ्या ब्रेडचे १-२ स्लाईस कुस्करून घालता येतात अथवा थोडे तांदळाचे पीठ घातले तरी चालते.
३. वरून लावण्यासाठी बारीक रवा वापरला तरी चालेल.
४. मिरची अगदी नकळत असावी भाज्यांची चव आणि मीठ येवढ्यावर हे कटलेट्स चांगले लागतात. आणि लहानमुलेही आवडीने बर्गर म्हणुन खातात.
५. ओव्हन नसेल तर अगदी कमी तेल घालुन शॅलोफ्राय करावेत.

Thursday, February 07, 2008

फ्लॉवर चटपटा (Chaptpata Cauliflower)

प्ह्लॉवरची भाजी माझी तशी फार आवडती भाजी नाही. अगदीच काही मिळाले नाही तर ही भाजी आणावी लागते आणि मग त्याचा तो उग्र वास घालवण्याचे अनेक उपाय करुन पाहावे लागतात. हे रामायण काहीवर्षांपुर्वी अश्विनीला ऐकवल्यावर तिने मला हा प्रकार सांगितला आणि माझा अगदी फेवरीट झाला.
Chaptpata Cauliflower
साहित्य -
१ फ्लॉवरचा गड्डा
५-६ काजु पाकळ्या
१०-१२ बेदाणे
१ टेबल्स्पून तेल
चवीप्रमाणे मीठ, लाल तिखट
१ टीस्पून गोडा मसाला
फोडणीसाठी जिरे, मोहरी आणि हळद

कृती -
फ्लॉवरचे तुरे साधारण अर्धा ते एक इंच जाडीचे कापुन घ्यावेत. खालच्या गड्ड्याचे पण तसेच लहान तुकडे कापून घेउन सर्व धुवुन घ्यावे. पाणी शक्यतो पूर्ण निथळु द्यावे. एका जाड बुडाच्या कढईत तेलाची जिरे, मोहरी आणि हळद घालुन फोडणी घालावी. त्यात काजुच्या पाकळ्या व बेदाणे घालावेत. वरुन फ्लॉवर घालुन परतायला घ्यावे. त्यात लाल तिखट, गोडा मसाला घालुन परतावे. बारीक गॅसवर साधारण ५ एक मिनीटे परतल्यावर चवीप्रमाणे मीठ घालावे. आता कदाचीत फ्लॉवरला पाणी सुटेल परत बारीक गॅसवर फ्लॉवर पूर्ण कोरडा होईल इतके परतावे. फ्लॉवर नीट शिजला की खाली उतरवून कोथिंबीर घालुन गरम गर्म फुलक्यांबरोबर वाढावे.

टीप -
१. ह्या भाजीला शक्यतो हिंग घालु नये उग्र वाटतो.
२. भाजी पूर्णपणे कोरडी करावी.
३. फ्लॉवरचा गड्डा कितीही मोठा असला तरीही भाजी खूपच कमी होते.
LinkWithin Related Stories Widget for Blogs